Ginakilala sang Association of Iloilo Provincial Government Employees ang ginpagwa nga memorandum sang Provincial Government of Iloilo nga nagapahanumdom sa mga empleyado nga dapat may ara sang professionalism kag dignidad sa ila opisina nga ila gina-serbisyuhan.
Sa interview sang Bombo Radyo kay Joecel Mayor, presidente sang Association of Iloilo Provincial Government Employees, iya ginpahayag nga may mga bagay nga kinahanglan pa klaruhon, ilabi na sa bahin sang freedom of speech sang mga empleyado.
Ginpahayag niya nga ang freedom of speech sang mga empleyado indi dapat mangin contradictory sa mga patakaran sang provincial government.
Gani, nagapati siya nga ang pagpagwa sang memorandum kabahin sang regulations and policies sang provincial government agud masiguro nga ang tanan nga empleyado magapadayon sa pag-uphold sang dignity kag professionalism, ilabi na sa paghatag sang mga kritisismo.
Gindugang man niya nga, bisan ginatahod nila ang amo nga polisiya, kinahanglan man sang mga empleyado nga masiguro nga kon magapost sila sa social media, klaro nga ginahimo nila ini sa personal nga kapasidad kag ginagamit ang ila personal nga account.
Ginpahayag man ni Mayor nga bilang mga empleyado sang gobyerno, may mga layi sila nga kinahanglan sundon, kaangay sang Republic Act No. 6713 ukon ang Code of Conduct and Ethical Standards for Public Officials and Employees.
Ginpahayag man niya nga may mga proper venues kag awtoridad nga amo ang nagadumala sa pagdisiplina sa mga empleyado kon may paglapas sa ginamando sang layi, kag amo man sa ila mga katungdanan kag responsibilidad bilang mga empleyado sang Provincial Government of Iloilo.
