Iloilo – Nag-abot na ang una nga batch sang Patriot Advanced Capability-3 Missile Segment Enhancement sa Poland nga gin-procure halin sa Lockheed Martin nga nabase sa Estados Unidos.
Ang missile ang gamiton para sa Patriot medium-range air defense system sang amo nga pungsod.
Suno kay Bombo Neva Intrepedido-Kessler, international correspondent sa Poland, iya ginpahayag nga gindisenyo ang missile agud madepensahan ang Poland sa modern airborne assault assets, lakip na ang tactical ballistic missiles, cruise missiles, kag aircraft.
Ginpahayag dugang sang natungdan nga isa ini sa moderno nga armas sang Polish air defense Wisła system.
Nahibaluan nga sang 2018, nagpirma ang United States kag Polish governments sang kasugtanan sa pag-procure sang Patriot missiles kag iban nga mga armas para sa Poland.
Ang Patriot Advanced Capability-3 Cost Reduction Initiative kag Patriot Advanced Capability-3 Missile Segment Enhancement ang napilian sang 14 ka mga pungsod kalakip na ang Poland.
