Natalana nga magnubo ang airfares sa Septyembre kasunod man sang pagbuhin sang gobyerno sa fuel surcharge nga ginapasa sang mga airline company sa consumers.
Sa advisory sang Civil Aeronautics Board (CAB), ginmanduan ang carriers nga paus-uson ang fuel surcharge sa Level 5 sa masunod nga bulan halin sa Level 6 subong nga Agusto nga nagapanubo man sa gasto sa air travel.
Sa Level 5, mahimo sukton sang airlines ang fuel surcharge nga P151 tubtub P542 sa domestic flights kag P498.03 tubtub P2,867.82 para naman sa international trips.
Sa idalom sang ginapatuman nga Level 6 subong, yara ang fuel surcharge sa P185 tubtub P665 para sa local flights kag P610.37 tubtub P4,538.4 para sa foreign trips.
Nag-desisyon ang CAB nga buhinan ang fuel surcharge para ma-reflect ang recent reduction sa petroleum prices nga gin-report sang International Air Transport Association.
Base sa record, ang domestic carriers ang masami nagalaum na sang surge sa travel frequency sa second half sang tuig bangud masami nga nagabyahe ang Filipinos sa All Saints’ Day kag Christmas seasons.
