Ilisipon na lamang ang inadlaw antes ang Christmas break — buot silingon, tion naman ini agud makabyahe ang kadam-an ilabi na ang mga estudyante.
Isa gid sa indi naton gusto ma-eksperyensyahan amo ang madulaan sang bag sa airport, apang masami gid ini nagakatabo ilabi na kun nagadugok ang mga pasahero.
Apang nakahibalo ka bala nga may yara sang airport nga 30 ka tuig na nga matinlo ang record kun halungay sang baggage sang pasahero ang pagahambalan?
Ini ang Kansai International Airport (KIX) nga amo ang ikapito sa pinakamasako nga airport sa Japan.
Pahayag sang paluparan, wala gid ini nakaagi-dula sang bag halin sang pagbukas nila sang Septyembre 1994.
Kada tuig, ini nga airport ang naga-average sang 20-30 million nga mga pasahero.
Madamo ang nagadayaw sa sini nga achievement, apang indi ini “big deal” para sa airport staff. Suno sa Kansai, indi man ini “something special” bangud ginahimo lamang nila ang ila trabaho paagi sa paghalong sang gamit sang mga byahero.
Sa pagkamatuod, sini nga tuig, nakabaton sang award ang amo nga paluparan sa world’s best airport baggage delivery.
Ang naghatag sang pagkilala amo ang UK-based aviation ranking and rating website nga Skytrax.
Ang Kansai ang natukod sa artificial island sa Osaka Bay kag nagaserbe ini sa Osaka, Kyoto kag Kobe regions.
Para sa 2024, nagapang-18 ang Kansai sa lista sang best airport in the world overall, kasunod sa mga kaiping sini nga Tokyo, Narita (fifth place) kag Haneda (fourth).
Nahibaluan nga ang on time nga baggage arrival ang isa lamang sa factors nga ginalantaw kun mag-rank sa “world’s best” airport.
Ginakonsiderar man diri ang food and drink offerings, percentage sang on-time arrivals kag departures, kag siyempre, ang kalimpyo para kumportable man ang byahe sang mga pasahero.
Sa subong, nakatutok ang Kansai sa renovation kag bag-o nga security checkpoint bilang pagpanghanda sa Expo 2025 ukon kilala anay nga World’s Fair nga natalana nga patigayunon sa Osaka, Japan.#
