AJUY, ILOILO — Ginkakibot ni Ajuy, Iloilo Mayor Jett Rojas nga nadugayan ang pag-apruba sang Sangguniang Panlalawigan sa programa nga cash for work and cash for training sang Department of Social Welfare and Development (DSWD) Region 6.
Ini kasunod man sa hingyo ni Iloilo Governor Arthur Defensor Jr. sang authority agud makapirma sa memorandum of agreement kaupod ang DSWD para sa implementasyon sang nasambit nga programa.
Sa interview sang Rojas, iya ginpahayag nga nagatingala gid siya kun ngaa nangin kontrobersyal ang programa bangud ika-tatlo na ini nga tuig nga ginapatuman sang Local Government Unit (LGU) sang Ajuy.
Suno kay Rojas, indi lang man ila banwa ang makabenepisyo sang amo nga tikang bangud luwas sa Ajuy, lakip man sa amo nga programa ang banwa sang Batad, Estancia, San Dionisio, kag Sara.
Ginpahayag man sini nga sa 34 ka mga barangay sa Ajuy, pito diri ang natumod agud nga makabaton sang assistance, sa diin may kapin 441 ka mga beneficiaries.
Nahibaluan nga wala na aprubahan sang Marso ang amo nga programa, rason nga ginhatag ini sa komitiba ni Iloilo 5th District Board Member Carol-V Espinosa Diaz nga Committe on Social Welfare, Housing, Senior Citizens, and Persons with Disability.
Nagapanindugan naman si Rojas nga may kopya ang DSWD Region 6 sang mga beneficiaries nga ginhatag sang ila banwa.
