Hugot nga ginpanginwala ni Ajuy Mayor Jett Rojas nga armed goons ang nakit-an nga mga lalaki nga may dala nga mga malagba nga armas sa parada sang ila kapiestahan sang damlag lang.
Sa interview sang Bombo Radyo kay Mayor Rojas, iya ginpahayag nga ang nasambit nga mga lalaki nga ginatawag nga Blue Guards ang mga personnel sang licensed security agency nga nakabase sa Metro Manila.
Suno kay Rojas, gin-imbitar sini ang tag-iya sang agency bangud nga tumandok ini sang Ajuy nga nangin maayo ang pagpangabuhi kag nagbulig man sa mga pumuluyo sang banwa.
Pahayag niya, ini bilang pagpakita man sang iya pagpasalamat sa amo nga indibidwal.
Nahibaluan nga gin-deploy ang nasambit nga Blue Guards para magbantay sang sitwasyon sa Ajuyville kun sa diin ginahiwat ang food festival kag may yara man sang peryahan kag mga rides gani madamo sang mga tawo.
Nagpabutyag sang iya pagkadismaya si Ajuy Mayor Jett Rojas kay Board Member Carol V Espinosa-Diaz.
May kaangtanan ini sa ginpalab-ot ni Diaz kay Iloilo Provincial Police Office Director Police Colonel Bayani Razalan natuhoy sa ginapasuni armado nga mga lalaki sa banwa.
Suno kay Rojas, kuntani nagpalapit sa iya si Diaz agud masugilanunan nila ang nasambit nga butang.
Apang, suno sa alkalde, bangud sa sobra nga kainit sang pamulitika, kaangay nga gilayon siya nga ginpakalain sang board member.
Nahibaluan nga ginabati-bati nga magpadalagan si Espinosa- Diaz sa pagka-alkalde sang banwa.
