Gintawag ni Akbayan Partylist Representative Percy Cendaña si Chinese Ambassador Jing Quan nga isa ka ‘bully’ kag ‘troll’.
Sa interview sang Bombo Radyo kay Rep. Cendaña, iya ginpahayag nga ang pamatasan ni Quan ang wala nagakaangay sa isa ka diplomat.
Suno sa iya, kun wala nakaandan sang China ang freedom of expression rason nga indi ang mga ini kahaso nga ginapamangkot ukon ginakwestyon sang mga tawo ang ila gobyerno kabaliskadan ang Pilipinas bangud nga wala nagapabilin nga mahipos ang mga Pilipino ilabi na kun ang mga ini ang ginapigos.
Pahayag ni Rep. Cendaña, ang ila pagduso kay President Ferdinand Marcos Jr., nga ideklarar nga persona non grata si Chinese Ambassador Jing Quan sa idalom sang ila gin-file nga House Resolution No. 1562., ang isa ka paagi sang pagpakita sang panindugan sang Pilipinas paagi sa diplomasya.
Pahayag niya, ang ini nga tikang ang indi dapat makita bilang pagtalikod sa diplomasya, bangud ang pagdeklarar sang isa ka diplomat bilang persona non grata ang isa man ka diplomatic option nga ginatugutan sa idalom sang Vienna Convention.
Ginpahayag man sang kongresista nga dapat magpabilin nga mabakod ang panindugan sang Pilipinas bangud kon padayon lamang nga magahipos bangod sa kahadlok, mahimo lamang nga magdugang pa ang pagpamigos sang China.
Ginpabug-atan man niya nga dapat mas pabaskugon pa ang seguridad kag depensa sang pungsod paagi sa pagsupporta kag paghatag sang modernization nga mga kagamitan sa Armed Forces of the Philippines.
Ginpunto man niya ang pagsolbar sang away sa West Philippine Sea ang dapat magpabilin nga naka-base sa international law kag diplomasya.
Dugang pa niya nga kasunod sa wala untat nga pagpangbastos sang China sa Pilipinas, tion na para manindugan kag ipagbato ang kinamatarong sang pungsod kag sang mga Pilipino.
