Tuman ang pagpasalamat ni AKO-OFW party-list nominee Dr. Joseph Rivera matapos sila nga ginhilway matapos mapreso bangud sang pila ka mga paglapas ukon sa pagpatigayon sang ‘illegal gatherings’ nga wala sang permit gikan sa gobyerno sang Qatar.
Sa idalum sang Qatar’s Law No. 18 of 2004, hugot nga ginadumilian ang bisan ano nga pagtililipon nga ginahiwat nga wala sang permit.
Sa interview sang Bombo Radyo kay Dr. Rivera, Bombo International Correspondent sa Quatar, iya ginpasalamatan ang gobyerno, partikular ang Department of Foreign Affairs (DFA), Department of Migrant Workers (DMW), Philippine Embassy kag Migrant Workers Office sa Doha, sa legal nga suporta, essential goods kag cash allowances nga ginpanagtag sang mga departamento agud nga makaupod nila ang ila pamilya pagkatapos sang ila pagkabilanggo.
Suno kay Rivera, saludo man siya sa sistema sang hustisya sang Qatar bangud sa ila pagbantay kag pagkonsiderar bilang equal samtang nagapadayn ang proseso sang insidente.
Apang ginklaro sini nga wala sang rally nga natabo sa ila pagtililipon kabaliskaran sa nagalapta nga impormasyon kon ngaa sila ang gindakop.
Gin-ako ni Rivera nga may yara sang beach picnic camping kag lunsay sila nakasuksok sang bayo nga may nakasulat nga pangalan ni Former President Rodrigo Duterte, apang indi ini para maghiwat sang protesta sa kaadlawan sang anay presidente.
Ginpanginwala man sini nga isa ka ‘political event’ ang ila ginhimo.
Liwat man sini ginpanindugan nga ‘misunderstanding’ lamang ang natabo rason nga gindakop sila nga 17 nga mga Pinoy.
