Gin-revoke sang Aksyon Demokratiko ang pag-file sang certificate of candidacy (COC) sang isa ka party member nga naggamit sang Certificate of Nomination and Acceptance (CONA) agud magpadalagan sa pagka-kongresista sa baylo nga magpadalagan bilang sangguniang bayan member.
Sa interview sang Bombo Radyo kay Mr. Bryan Cerebo, spokesperson sang Aksyon Demokratiko kag Sangguniang Kabataan (SK) Federation president sa New Lucena, Iloilo, iya ginpahayag nga ginkakibot nila nga may kandidato nga nag-file sang COC agud bunggo-on si incumbent Iloilo 2nd District Representative Michael Gorriceta.
Gin-ako ni Cerebo nga blanko ang CONA nga gingamit sang amo nga kandidato.
Suno sa iya, wala man ini naglabay sa local leadership kag sa baylo, nagdiretso sa national party leadership.
Bangud sini, pahayag niya, magapasaka man sang kaso ang partido batok sa nasambit nga kandidato kag sa mga indibidwal nga posible may kaangtanan sa natabo nga filing sang COC.
