ILOILO CITY – Kanselado na ang tanan nga aktibidad may kaangtanan sa Semana Santa bangud sa Coronavirus Disease 2019 (COVID-19).
Ini ang ginkumpirma sang Archdiocese of Jaro sa ginpatigayon nga press conference kaina sang kahapon.
Suno kay Rev. Fr. Angelo Colada, Director sang Social Communications sang Archdiocese of Jaro, tanan nga aktibidad sang Simbahan Katolika ang kanselado may kaangtanan sa pagsaulog sang Semana Santa.
Ginpahayag ni Colada nga umpisa Marso 18, automatic na nga kanselado ang tanan nga congregation gatherings magluwas lang kun indi gid mapaiway.
Ang bunyag naman suno kay Colada ang magapadayon apang limitado lang ang attendees kag mas makapaayo kun i-reschedule na lang.
Sa tion nga may yara sang indi mapaiway nga aktibidad, nakadepende ini sa Kura Paroko apang kun indi mahisayran, ang Arsobispo na ang magadesisyon.
Kun lubong naman, ang misa ang patigayunon sa balay sang minatay apang kun indi gid mapaiway, limitahan lang ang tawo nga magasulod sa simbahan.
Ang misa suno sa natungdan ang mahimo nga ipaagi sa live coverage sang media ukon sa live streaming apang nagapangita man sang iban pa nga alternatibo ang Simbahang Katolika.
