Sa labing-una nga tion sa sulod sang 63 ka tuig, nakabulsa na gid man sang medalya ang Pilipinas sa Asian Women’s Volleyball Challenge Cup (AVC)!
Ini paagi sa Alas Pilipinas nga naglutos sa Australia sa straight sets, 25-23, 25-15, 25-7, kag amo ang nakakuha sang maragtason nga bronze medal.
Matandaan nga na-sweep sang Pilipinas ang Pool A kag nakasulod sa semifinals, apang nag-settle lamang sa battle for third matapos nalutos sa kamot sang Kazakhstan sa straight sets sang Martes.
Antes ang bronze medal match, matandaan nga una man nga ginlutos sang Pilipinas ang Australia sa preliminary round, kag apisar mas mataas ang ila mga myembro, napaslawan ang mga ini nga makatimalos sa Alas sa ila liwat nga pagkit-anay.
Sa isa ka oras kag 15 minutos nga knockout battle, naka-skor si Angel Canino sang 14 points, si Sisi Rondina ang may 13 points, Thea Gagate nga may 10 points, kag Eya Laure nga may 10 points.
Ang team captain sang Alas Pilipinas amo si Jia De Guzman nga amo man ang nagdaog sang Best Player of the Game honors. Napilian man si De Guzman bilang Best Setter sa bug-os nga tournament samtang si Canino ang Best Opposite Spiker.
Ginhatag ini nga pagkilala sa awarding ceremony kasunod sang gold medal match sa tunga sang Vietnam kag Kazakhstan.
Ini man ang una nga podium finish sang Pilipinas sa volleyball halin sang 2019 kun sa diin ang katapusan amo ang second leg sang ASEAN Grand Prix ukon SEA V.League.
Sa pihak nga bahin, sa bug-os nga record sang Pilipinas, wala ini nakadaog sa championship sa international volleyball competitions sa sulod sang 31 ka tuig. Ang katapusan nga gold ang nakuha pa sa Singapore sang 1993 Southeast Asian Games.
