Ginatinguhaan sang otoridad nga madala-pauli ang bangkay sang isa ka piloto kag siyam ka mga pasahero nga sakay sang nagtibusok nga eroplano sa state of Alaska sa Estados Unidos sang Amerika.
Ginalagas sang otoridad ang tyempo nga makuha ang mga bangkay kag ang mga parte sang eroplano halin sa indi estable nga sea ice antes maglala ang tyempo kag ang pag-snow subong nga weekend.
Base sa Nome Volunteer Fire Department, nakilala na ang tanan nga sakay sa commuter aircraft kag kumpirmado nga tanan sila ang ginbawian sang kabuhi.
Ini amo sanday Chad Antill, 34-anyos nga piloto halin sa Nome; kag ang mga pasahero nga sanday Liane Ryan, 52; Donnell Erickson, 58; Andrew Gonzalez, 30; Kameron Hartvigson, 41; Rhone Baumgartner, 46; Jadee Moncur, 52; Ian Hofmann, 45; Talaluk Katchatag, 34; kag Carol Mooers, 48.
Matandaan nga na-missing ang Cessna 208B Grand Caravan aircraft nga gina-operate sang Bering Air sang Huwebes sang hapon (oras sa state).
Suno sa US Coast Guard, naka-eksperyensya ini sang rapid loss of altitude and speed samtang yara sa Norton Sound sa western coast sang Alaska.
Natabo ini nga plane crash matapos nga nangin sentro man sang atensyon ang US air travel and aviation forces kasunod sang pagbungguanay sang passenger plane kag military helicopter kag nahulog pa sa Potomac River sa Washington D.C.
Sa amo nga hitabo sang Enero 29, wala man sang survivors — 67 ang patay.
Pagka-Enero 31, nagtibusok man ang Medevac jet sa Philadelphia kun sa diin pito ang patay kag 20 ang pilason.#
