Ginalantaw sang fans nga magsugat-anay liwat ang banas sang Serbian superstar nga si Novak Djokovic kag bataon nga player sang Espanya nga si Carlos Alcaraz sa US Open matapos ang finals sa Wimbledon kag Paris Olympics.
Antes ini matabo, kinahanglan anay nga lutuson sang world number 3 nga si Alcaraz ang No. 1 nga si Jannik Sinner sa semifinal.
Nangin kontrobersyal sang nagligad nga semana si Sinner matapos nabulgar nga duha ka beses ini nga nagpositibo sa doping test sang Marso apang na-clear gihapon kag nakahampang bangud ginrason nga nagsulod ang illegal substance sa iya lawas paagi sa masahe nga ginhimo sang iya trainer.
Sa pihak nga bahin, si Djokovic naman ang nakakuha sang iya 24th Grand Slam singles title sa US Open sang nagligad nga tuig, apang wala na ini nadugangan bangud nalutos siya ni Sinner sa Australian Open semifinals, nag-atras siya sa French Open bangud sa right knee injury, kag ginlutos naman siya ni Alcaraz sa Wimbledon.
Nakabutwa ang Serb icon sa Paris subong lang nga bulan sang ginpierde niya ang Spaniard sa finals kag nakuha ang iya una nga Olympic gold medal.
Daku nga pagpanghangkat ini sa 37-anyos nga tennis legend bangud 14 ka tuig na ang nagligad sang nakahampang siya sa apat ka majors sa isa ka season nga wala sang may nadag-an nga bisan isa ka titulo.
