ILOILO CITY- Hugot nga ginpanginwala sang isa sa mga regular employees sang Iloilo City Government nga ginpasakaan sang reklamo nga electioneering ang alegasyon batok sa iya sang apat ka mga jobhires.
Sa interview sang Bombo Radyo kay Eireen Manikan, isa sa mga ginareklamo upod sanday Danny Tan kag Vincent Dela Cruz, iya ginpahayag nga ginkakibot niya nga may reklamo batok sa iya tuhoy sa ginaalegar electioneering.
Suno kay Manikan, indi niya gani kilala ang mga tagreklamo nga sanday Dennis Biñas, Julia Bitonga, Jena Jose kag Donephine Dominggo nga nag-alegar nga ginpilit sila ni Manikan nga suportahan ang kandidatura ni anay Iloilo City Mayor Jose Espinosa III kabaylo sang seguridad nga indi sila pagpahalinon sa trabaho.
Gin-ako ni Manikan nga naglain gid ang iya buot bangud gin-akusahan siya sang isa ka butang nga wala niya ginhimo kag nahibaluan niya nga wala ginapahunugatan bilang empleyado sang gobyerno.Dugang pa sang natungdan, mas nasakitan pa gid siya bangud ginpa-leave sila nga mga involved sa nasambit nga kontrobersya.
Ginpahayag naman ni Manikan nga sa pihak sang kontrobersya nga nag-mantsa sang iya pangalan, magagwa gid ang kamatuoran.
