Naguwa sa imbestigasyon sang La Paz Police Station nga indi matuod nga gin-abduct ang isa ka lalaki nga una nga gin-alegar nga ginpilit nga pasakyon sa isa ka salakyan sa atubang sang La Paz plaza kagab-i, Mayo 5.
Ang gin-alegar nga gin-abduct kagab-i amo si Laurence John Prieto, 29, residente sang Barangay Caingin, La Paz, Iloilo City.
Sa interview sang Bombo Radyo kay Police Staff Sergeant Theodore Michael Soleño, imbestigador sang La Paz Police Station, iya ginpahayag nga nag-inform ang pamilya kaina sang kaagahon nga yara sa iya abyan si Prieto kag wala sang abduction nga natabo.
Ginkumpirma man sang pamilya nga maayo ang kahimtangan sang ila nga himata.
Una na nagguwa ang impormasyon nga apat ka tawo ang nagpilit nga makuha si Prieto sa Lapaz Plaza kagab-i nga malapit man sa estasyon sang pulis.
Gin-athag sang pulis nga wala sang malain nga rekord ang amo nga lalaki sa barangay kag sa police station. #
