ILOILO CITY – Nagapatigayon sang random checkpoints ang mga personnel sang Public Safety and Transportation Management Office (PSTMO) sa mga boundaries kag mayor nga dalanon sa syudad sang Iloilo.
Ini ang kasunod sang nabaton nga reports sang Iloilo City Government nga may yara sang mga grupo halin sa syudad sang Iloilo nga nagapaamulya sa probinsya sang Iloilo agud mag-inom sang makahulubog nga ilimnon kag mag-party.
Indi nila ini mahimo sa syudad sang Iloilo bangud may liquor ban gihapon ang syudad nga yara sa general community quarantine (GCQ).
Sa interview sang Bombo Radyo kay Mr. Jeck Conlu, COVID-19 Team spokesperson sang Iloilo City Government kag pinuno sang Public Safety and Transportation Management Office, iya ginpahayag nga nag-umpisa na ang random checkpoints sang Biyernes, Disyembre 11.
Dugang pa ni Conlu, santo sa assessment sang mga otoridad, hubog ang mga driver sang nagaka-aksidente nga mga salakyan sa syudad kag kalabanan sa ila ang halin sa probinsya sang Iloilo.
May yara sang breath analyzer device nga ginagamit ang Public Safety and Transportation Management Office agud matumod kun hubog ang driver.
Ang madakpan sa Anti-Drunk Driving Operation ang magapangatubang sang mabug-at nga monetary penalty, suspension sang driver’s license kag posible pa mapreso suno kay Conlu.
