OTON, ILOILO – Ginpanginwala sang Oton PNP ang alegasyon sang pamilya sang caretaker nga ginluthang-patay sang ginapahayag riding-in-tandem sa Brgy. Alegre, Oton, Iloilo.
Kahapon, Oktubre 21, ginbawi-an sang kabuhi si Achilles Poe, 44 anyos sang Brgy. Baldoza, Lapaz, Iloilo City kag caretaker sang Kauswagan Village sa nasambit nga banwa kun sa diin gin-alegar sang pamilya nga wala gid sang may nagbulig agud nga madala sa hospital kag matabangan pa ang biktima.
Sa interview sang Bombo Radyo kay Police Staff Sergeant Randy Flores, case investigator, iya ginpahayag nga indi matuod nga may isa sa ila nga nakabuya sang pahayag nga indi na kinahanglan nga dal-on pa sa hospital ang biktima bangud nga wala naman ini sang kabuhi.
Sa pagpaathag ni Flores, ang doktor lamang ang makakumpirma tuhoy sa health bulletin sang biktima kag ang protocol amo nga ang ambulansya sang Municipal Disaster Risk Reduction and Management Office amo ang dapat nga magkarga padulong sa hospital.
Bangud nga naka-lockdown ang MDRRMO sang Oton matapos ang na record ang pila ka kaso sang COVID-19, ang doktor gikan sa Rural Health Unit amo ang nagpadulong sa area agud kumpirmahon ang health bulletin sang biktima.
Sa pagpaathag naman ni Jafet Salinas, COVID-19 focal person sang Local Government Unit sang Oton, ang Rural Health Unit amo ang nagaserbe nga back-up sang MDRRMO nga naka-lockdown sa subong.
May kaangtanan sa alegasyon sang pamilya tuhoy sa uyaya nga pagpatigayon sang emergency response, ginpahayag sang natungdan nga iya hibaluon sa Rural Health Unit kun ano gid ang matuod nga natabo.
Sa tion sang emerhensya, mahimo nga malab-ot ang Rural Health Unit sa numero nga 338-3761.
