ILOILO CITY – Ginpasaka sa alert level 1 nagikan sa alert level 0 ang alert status sa Bulusan volcano sa Sorsogon bangud sang indi normal nga kondisyon sini.
Suno kay the Philippine Institute of Volcanology and Seismology (PHIVOLCS) Director kag Science Undersecretary Renato Solidum Jr., ang phreatic erruption ang nagluntad alas-10:37 kagina sang aga.
Ang paglupok ang tuga sang pagbukal sang tubig sa idalom sang crater.
Naglawig ini sang 16 minutos kag padayon subong nga gina-obserbaran.
Apang sang las-11:40 sa aga nga bulletin, ang paglupok sang bulkan ang naglawig sang 17 minutos.
Ang abo ang naglab-ot pa sa isa ka kilometro nga kataason nga nakita halin sa banwa sang Juban antes ini nga nagpadulong sa nakatundan nga direksyon.
Bangud sini, ginpataas sa Alert level 1 kag naglab-ot sa 77 ang numero sang volcanic earthquakes sa bilog nga gab-i.
Sa pinakaulihi nga bulletin, ang ashfall ang gin-report sa Juban kag Casiguran.
Suno kay Irosin, Sorsogon Municipal Disaster Risk Reduction and Management Officer Fritzie Michelena, apat ka mga barangay sa Irosin ang may ashfall.
Pahayag niya, 800 ka mga pamilya ang slightly affected sang ashfall sa mga kabarangayan nga Cogon, Bolos, Gulang-Gulang kag Tinampo.
Ginahanda na sang local government ang posible nga evacuation efforts sang mga residente apang suno kay Michelena, indi pa ini kinahanglan.
Ang opisina ni Vice President Leni Robredo ang nag-anunsiyo na sang bulig para sa mga apektado nga mga residente.
Kung madumduman, sang 2016, ang Bulusan volcano ang nagbuga sang aso sa sulod sang 20 minutos sa apat ka mga kaiping nga mga barangay.
