Nalutos ang Pinay tennis star nga si Alex Eala sa kamot sang isa ka unseeded player sa iya imbukada nga hampang sa WTA 250 Guangzhou Open sa China.
2-6, 6-4, 6-4 ang resulta sang hampang pabor sa 25-anyos nga world No. 305 nga si Claire Liu nga nagatiglawas sang Estados Unidos sang Amerika.
Apisar sang temprano nga exit sa singles match, may oportunidad pa nga makabawi ang world No. 53 nga si Eala paagi sa doubles match sini 2:10 karon sa hapon.
Maka-pares ni Eala ang Ukrainian player nga si Nadiia Kichenok. Atubangon nila ang Chinese-British pair nanday Tang Qianhui kag Emily Appleton.
Kasunod sini nga Guangzhou Open, magapasakop ang Pinay tennis player sa Hong Kong Open sa October 25 tubtub November 2.
Ini ang iya pang-apat nga tour sa China sa nagligad nga duha ka bulan kasunod sang iya partisipasyon sa Jingshan, Wuhan, kag Suzhou.
