Nagsulod na ang pambato sang Pilipinas nga si Alex Eala sa championship match sang Mubadala DC Open matapos ginlutos sini sa semifinal subong nga kaagahon ang former world no. 1 kag four-time Grand Slam champion nga si Naomi Osaka.
Naglawig sang isa ka oras kag 16 minutos ang hampang antes napierde sang 21-anyos nga Pinay tennis star ang subong world No. 13 nga Japanese icon, 6-4, 6-2.
Ini nga kadalag-an amo ang naghatag kay Eala sang 1-0 nga career head-to-head edge batok kay Osaka.
Ini man ang mangin una nga appearance ni Eala sa final nga yara sa WTA 500 level.
Atubangon sini para sa kampyonato ang home favorite, top seed, kag world no. 3 nga si Jessica Pegula nga amo ang naglutos sa Russian player nga si Diana Shnaider 7-5, 6-4 sa ila nga semifinal showdown.
Matandaan nga si Pegula amo ang naglutos kay Eala sa iya nga breakout tournament sa Miami Open sang nagligad nga tuig.
Diri sa DC Open, nauna na nga ginlutos ni Eala sa temprano nga rounds sanday world No. 10 Elina Svitolina, defending champion kag Filipino-Canadian nga si Leylah Fernandez, kag Olympic champion nga si Qinwen Zheng.
