Sulod na sa semifinals sang Miami Open ang 19-anyos nga Pinay tennis star nga si Alex Eala matapos ginlutos ang world no. 2 kag five-time Grand Slam champion nga si Iga Swiatek sa quarterfinal round subong nga kaagahon, Marso 27 (oras sa Pilipinas).
6-2, 7-5 ang resulta sang hampang nga isa sa major upsets nga nahimo sa tournament nga natigayon sa kamot sang isa ka wildcard kag isa ka rising star nga pang-140 lamang sa world rankings.
Hulaton na lamang ni Eala ang winner sang quarters match sa tunga nanday Emma Raducanu kag Jessica Pegula nga amo ang iya maka-atubang sa semis.
Indi basta-basta ang napatumba ni Eala bangud ini nga Polish star ang nakadaog sa French Open sang apat ka beses kag isa ka bes naman sa US Open. Nangin world no. 1 man anay si Swiatek sa sulod sang 125 ka semana nga amo ang ikapito nga pinakamalawig nga pagtinir sa number one spot sa world rankings sa modern era.
Antes ang ila matchup sini nga kaagahon, ginbalikan pa sang tennis fans ang hitabo sa Rafael Nadal Academy kun sa diin sang nag-graduate si Eala sang 2023, si Swiatek ang special guest sa graduation rites nga sang amo nga tion preska pa sa iya kadalag-an sa French Open.
Antes ginlutos ang world no. 2, nangin matunog na ang pangalan ni Eala sa tennis world bangud sa paglutos sa top-ranked opposition sa una nga tatlo ka rounds lakip si world No. 5 kag reigning Australian Open champion Madison Keys kag former French Open winner Jelena Ostapenko pareho sa straight sets.#
