Posible mag-atubangay liwat ang Pinay tennis star nga si Alex Eala kag ang world No. 4 nga si Coco Gauff sa Indian Wells Open.
Antes ini matabo, atubangon anay ni Eala ang winner sa tunga nanday Zhang Shuai sang China kag Dayana Yastremska sang Ukraine. Sa pihak nga bahin, makasumpong naman ni Gauff ang winner sa tunga sang qualifier kag Bianca Andreescu sang Canada.
Pareho ang bracket ni Eala kag ni Gauff, gani nga balantayan ang ila pagkit-anay liwat pananglitan pareho man nila malutos ang una nila nga mga kasumpong.
Katapusan nga nagkit-anay sanday Eala kag Gauff sa Dubai Tennis Championships kun sa diin gindominar sang American player ang hampang, 6-0, 6-2.
Ginauyatan ni Gauff ang rekord bilang two-time Grand Slam Champion, apang todo-dayaw man ini kay Eala ilabi na sa kadamuon sang fans nga mahakot sini sa venue.
Kun matapos na sa Indian Wells Open, maga-compete ang world no. 32 nga Filipina star sa Miami Open ukon ang tournament kun sa diin nangin bantog ang iya pangalan bangud nagsulod siya bilang wildcard apang ginpanglutos sini ang tatlo ka Grand Slam champions sang nagligad nga tuig.
