Maga-atubang ang Pinay tennis star nga si Alex Eala sa mabudlay apang pamilyar nga kasumpong sa imbukada sang Australian Open qualifiers.
7:00 buwas sa aga, Enero 7, makasumpong sini ang world No. 136 nga si Jana Fett sang Croatia.
28-anyos na si Fett kag naka-abante sa second round sang French Open main draw sang nagligad nga tuig.
Naka-atubangay man anay sila sang Pinay player sa second round sang 2021 W25 Manacor sa Spain sang 16-anyos pa lamang si Eala. Sang amo nga tion, daog ang Croatian kag nagapang-97 sa world ranking.
Subong naman nga 2025, ika-148 na sa world ranking si Eala, nagaedad na sang 19-anyos, kag isa na ka 2022 US Open junior singles champion.
Sang 2024, tatlo ka beses siya nga halos makasulod sa Grand Slam event matapos nakasulod sa third and final qualifying rounds sang French Open, Wimbledon, kag US Open.
Nangin mabudlay naman ang iya banas sa Australian Open matapos wala na naka-abante halin sa opening round sang qualifiers sa 2023 kag 2024.
Sanday Eala kag Fett ang pareho man nga nag-intra sa WTA 125 Workday Canberra International sang nagligad nga semana. Nadagdag ang Croatian sa first round samtang nakadaog naman si Eala sang lima ka hampang lakip na ang duha sa qualifiers kag nakasulod pa sa semifinals.
128 ka players ang nagalaum para sa main draw sang Australian Open kag 41 diri ang may mas mataas nga ranggo ipaanggid sa Pinay tennis player.
Si world No. 84 Alycia Parks sang United States amo ang top seed kag highest ranked player sa qualifiers kag nakalab-ot anay sa third round sang 2024 Australian Open.
