Naghimo sang maragtas si Alex Eala matapos nangin una nga Filipina tennis player nga nakalab-ot sa Women’s Tennis Association (WTA) tour final game.
Nahimo niya ini matapos ang mabudlay kag makapoy nga semifinal game batok kay Varvara Gracheva sang France sa Eastbourne Open nga naglawig sang duha ka oras kag 22 minutos.
Nakuha sang 20-anyos nga Pinay ang first set, 7-5, apang nakabawi ang French sa ikaduha nga set, 2-6.
Sa deciding set, diri na ginbubo ni Alex ang tanan, ginbalikan ang composure, tubtub nga nagtakop ang hampang pabor sa Pinay, 6-3.
Pagkatapos sang hampang, nagsaka man si Eala sa world no. 56 sa live ranking.
Antes sa semifinals, lima ka sunod-sunod nga hampang ang gindaog ni Eala sa United Kingdom lakip na ang duha sa qualifying rounds, kag sa main draw naman, lakip sa iya ginlutos via walkover amo si former Grand Slam champion Jelena Ostapenko.
Ini ang longest winning run ni Eala halin sang natabo ang Miami Open subong nga tuig kun sa diin ginpierde man niya ang tatlo ka former Grand Slam champions nga sanday Ostapenko, Madison Keys kag Iga Swiatek.
Sa final game subong nga weekend, atubangon ni Eala ang isa man ka bataon nga player nga si Maya Joint halin sa Australia. Nagapang-51 sa world ranking ang 19-anyos nga Aussie player nga amo ang naglutos sa Russian veteran nga si Anastasia Pavlyuchenkova, 7-5, 6-3, sa semifinal game.#
