Nag-abante na ang Pinay tennis star nga si Alex Eala sa semifinals sang 2025 Eastbourne Open matapos ginlutos ang World No. 42 nga si Dayana Yastremska sang Ukraine sa quarterfinal round, 6-1, 6-2.
20-anyos pa lang kag nagapang-74 si Eala sa ranking, samtang ang iya kasumpong ang may 21 wins na subong nga 2025 kag mas mataas pa sa ranking.
Ang Eastbourne Open amo ang katapusan nga tournament ni Eala antes ang pagpasakop sini sa Wimbledon nga natalana sa Hunyo 30.
Antes sa quarterfinals, ginlutos man ni Eala ang former Grand Slam Champion nga si Jelena Ostapenko sang Latvia sang wala sini napatapos ang hampang bangud sa injury.
Sunod nga atubangon sang Pinay amo si Varvara Gracheva sang France sa semis nga iya man anay ginlutos sa first round sang Nottingham Open qualifiers.
Ang iya partisipasyon sa Eastbourne Open sa England ang kasunod man sang iya impresibo nga semifinal appearance sa Miami Open sa temprano nga bahin sang tuig kun sa diin lakip sa iya naatubang amo ang dalagku nga players lakip si Iga Swiatek, Ostapenko, kag Madison Keys.
