Natapos na ang kampanya sang Pinay tennis star nga si Alex Eala sa labing-una nga edisyon sang WTA 125 Philippine Women’s Open.
Ini matapos nalutos siya sa quarterfinals sa kamot sang Colombian nga si Camila Osorio, 4-6, 4-6, sa Rizal Memorial Tennis Center.
Nanugon si Eala nga indi na siya makapadayon pa sa semifinals, apang ang mas importante suno sa iya, nadala ang WTA match diri sa Pilipinas kag mas madamo nga mga Pilipino ang nakalantaw.
Nahibaluan nga ini ang iya nga international match nga ginhiwat sa atubang sang Filipino fans diri sa pungsod.
“Sayang, hindi pumasa sa level pero ang importante, nandito ako sa Manila, sa Pilipinas at nandito ang WTA. Enjoy the rest of the week, I hope you all guys get inspired and learn to love tennis. I love tennis so much so I’m lucky to be able to share this experience and journey with all of you. Maraming salamat,” pahayag sang Pinay star.
Maga-atubang naman si Osorio kay Solana Sierra sang Argentina nga amo naman ang naglutos kay Lanlana Tararudee sang Thailand, 6-3, 6-4, sa quarterfinal match.
Mangin masako naman si Eala sa WTA 500 Mubadala Abu Dhabi kun sa diin magadiretso siya sa main draw matapos napilian bilang wildcard.
