ILOILO CITY – All seat na ang pambato sang Iloilo City nga si Alexie Brooks para sa preliminary competition sang Miss Universe Philippines 2024.
Sa interview sang Bombo Radyo kay Malick Hilado, Manager kag Creative Director sang Team Alexie Brooks, iya ginpahayag nga subong nga adlaw, ginpatigayon ang closed door interview.
Suno kay Hilado, ang closed door interview amo ang paborito sang Ilongga beauty queen.
Las 7:00 naman subong nga gab-i, patigayunon ang preliminary competition.
Diri kag magapaindis-indis ang 53 ka mga kandidata para sa swimsuit kag evening gown.
Ang makakuha sang pinakamataas nga score ang automatic nga makasulod sa semi-final round.
Lakip man sa semifinalists amo ang top winners sang nagkalain-lain nga challenges antes ang final show kaangay sa swimwear, runway, interview, kag casting reel.
Mangin host sa preliminary competition si Miss Universe Philippines 2023 Michelle Marquez Dee kag aktor nga si Marco Gumabao.
Ang grand coronation night ang patigayunon sa Mayo 22 kun sa diin magluwas sa Miss Universe Philippines 2024 crown, may apat ka iban pa nga national crowns nga ihatag sa apat ka iban nga mga kandidata.
Ini amo ang Miss Supranational Philippines, Miss Charm Philippines, Miss Eco International Philippines, kag Miss Cosmo Philippines.
