Nakaabot na ang Ilongga beauty queen nga si Alexie Mae Brooks sa Egypt agud handaan ang pagtiglawas sa Pilipinas sa Miss Eco International 2025 pageant.
Gin-share ni Alexie ang iya pictures sa iya arrival sa amo nga pungsod suksok ang puti nga structured suit, pair of shorts, kag thigh-high boots.
Gilayon man nga nagtipon ang iban nga mga kandidata para sa orientation day nga amo ang pamuno sang global tilt para sa pag-promote sang advocacy kag sisterhood.
“Miss Eco Philippines is shining bright on her first day! Kicking off with a stunning photoshoot that captures her beauty, grace, and the spirit of sustainability. Stay tuned — this queen is ready to make waves!,” post naman sang organisasyon nga nagalakip sang pictures sang Pinay delegate.
Nagpadala naman sang cheers kag mensahe sang good luck ang iban nga Filipina beauty queens kaangay kanday Ahtisa Manalo kag Victoria Velasquez Vincent.
Si Alexie ang nagtapos anay sa Top 10 sang Miss Universe Philippines 2024 kun sa diin si Chelsea Manalo ang nagdala-pauli sang korona.
Sa nauna nga interview sang Bombo Radyo kay Brooks, ginpahayag sini nga antes magkadto sa Egypt, paspas na ang ila preparasyon para madeliver ang best performance sa stage lakip na ang para sa question-and-answer, runway performance, kag advocacy work nga naka-sentro sa women empowerment.
Ini ang iya una nga international pageant, gani may pressure suno sa iya, apang ginakabig man niya ini nga pribilehiyo. Pananglitan magdaog ini, siya ang ikatlo halin sa Pilipinas nga may korona sa Miss Eco International pageant.
