Mahimo makonsiderar si suspended Bamban, Tarlac Mayor Alice Guo nga isa ka state witness KUN hingadlan sini ang higher-ranking individuals nga involved sa iligal nga mga aktibidad sang Philippine Offshore Gaming Operation (POGO) hubs sa pungsod.
Suno pa kay Presidential Anti-Organized Crime Commission (PAOCC) spokesman Winston Casio, ang konsiderasyon nga mangin state witness si Guo ang nakadepende pa sa abilidad sini nga i-implicate ang mga mas mataas nga indibidwal sa hierarchy sa ginaalegar nga criminal activities.
Agud mag-qualify nga state witness ang isa ka tawo, dapat suno sa natungdan nga amo ini ang least guilty sa bug-os nga conspirational chain ukon ang mga naghimbunanay agud nga magkomiter sang krimen.
Apang suno kay Casio, indi si Guo ang least guilty kun basehan ang mga ebidensya nga natipon.
Nahibaluan nga sa idalom sang Republic Act 6981 ukon ang Witness Protection, Security and Benefit Act, mahimo mapasulod sa Witness Protection Program ang bisan sin-o nga persona nga may ihibalo ukon impormasyon sa ginhimo nga krimen kag nag-testigo ukon handa mag-testigo.
Matandaan naman nga sang Biyernes, nag-petisyon na ang Office of the Solicitor General (OSG) agud nga makanselar ang certificate of live birth ni Alice Guo matapos nabuyagyag nga siya man ang Chinese national nga si Guo Hua Ping.
