Isa ka ‘welcome development’ para sa legal team ni dismissed Bamban, Tarlac Mayor Alice Guo ang pagkadakop sa iya sa Indonesia.
Sa statement sang kampo ni Guo, ginsiling nga mahatagan na sang oportunidad ang anay alkalde nga masabat ang mga legal issue nga ginahaboy batok sa iya kag ang mga reklamo nga ginapangatubang sini kaangay sang qualified human trafficking, money laundering, kag tax evasion nga nag-ugat sa ginaalegar nga kaangtanan sini sa Philippine offshore gaming operator (POGO) sa Bamban.
Magluwas diri, na-kwestyon man pati ang identity sini nga natukiban nga isa gali ka Chinese national nga si Guo Hua Ping.
Suno sa team, nagapasalamat sila nga safe ang pagkadakop kay Guo ilabi na bangud nahangawa gid sila sa ikaayong lawas, safety, kag seguridad sini halin sang na-missing ini sa Pilipinas.
“We, the Legal Team of Alice L. Guo, would like to express our gratitude and relief regarding the safe apprehension of then Bamban, Tarlac Mayor Alice Leal Guo,” kabahin sang statement.
“She may not know or realize it by now, but this recent event can be a good start for all her cases.”
Nangabay man ang kampo sa publiko nga likawan anay ang paghaboy sang mga akusasyon batok sa former mayor bangud nagapabilin ini nga inosente samtang wala pa napamatud-an ang mga reklamo batok sa iya.
“We would like to remind the public that unless proven otherwise, Alice L. Guo is innocent… In relation to this, we respectfully urge the public to refrain from making crude and malicious comments and baseless accusations as all matters related to our client will be ventilated and answered in the proper forum and before courts of competent jurisdiction,” dugang sang legal team.
Miyerkules sang kaagahon sang nadakpan si Guo sa Tangerang, Indonesia kag gina-proseso agud nga mapabalik diri sa Pilipinas. Nagpasalig ang otoridad nga himuon ini subong nga semana.#
