Magapadalagan liwat si dismissed Bamban, Tarlac Mayor Alice Guo sa pagka-alkalde sa Bamban, Tarlac.
Suno sa iya legal counsel nga si Atty. Stephen David, nagaplano si Guo nga mag-file sang iya nga certificate of candidacy (COC) para sa 2025 elections kag ginapreparar na subong sang legal team ang iya nga mga dokumento.
Suno kay David, dapat nga pabay-an nga ang mga botante mismo sa Bamban ang magadesisyon kun gusto nila nga mag-pungko liwat si Guo.
“She will run,” suno sa legal counsel. “Why don’t we let the people decide kung gusto siya ng tao?”
Base sa pagsulundan sang Commission on Elections (Comelec), mahimo maka-file si Guo sang COC paagi sa representative bangud nakahunong ini subong sa presuhan sa Pasig City.
Matandaan nga ginsipa sang Ombudsman sa pwesto si Guo sang Agusto bangud sa ginaalegar nga grave abuse of discretion bangud sa operasyon sang Philippine offshore gaming operator ukon POGO hub sa ila banwa sa Tarlac.
Apisar nga ang amo nga order sa Ombudsman ang may penalidad nga perpetual disqualification from public office, mahimo pa ini maapelar, buot silingon, indi pa ini final and executory.
Kahapon, ang National Bureau of Investigation (NBI) sa pagpanguna ni Director Jaime Santiago ang nag-file sa Department of Justice (DOJ) sang complaints batok kay Guo.
Bag-o ini nga mga reklamo nga amo ang falsification by a notary public, use of falsified documents, perjury, kag obstruction of justice.
Ang mga gina-reklamo amo si Guo kag abogado nga si Elmer Galicia nga amo ang nag-notaryo sa iya counter affidavit apisar nga wala man ini sa Pilipinas sang Hulyo bangud nagpalagyo na ini sa luwas sang pungsod.
