Nag-depensa si Bamban, Tarlac Mayor Alice Guo nga “mistress” lamang sang iya amay si Lin Wen Yi, ang Chinese national nga amo ang ginatudlo sang mga senador nga amo ang iya biological mother.
Ginpahayag ini sang alkalde sa sulod sang lima ka pahina nga sulat nga iya ginpadala kay Senate Committee on Women, Children, Family Relations and Gender Equality chairperson Sen. Risa Hontiveros.
Antes sa sabat ni Guo, ginsapubliko nanday Hontiveros kag Senador Sherwin Gatchalian nga may nakit-an nga mga dokumento nga masami nagabyahe si Lin kaupod kay Angelito Guo nga amo ang amay sang alkalde. Sa sini nga mga byahe, ang kalabanan sa destinasyon amo ang China rason nga nagtaas ang suspetsa nga si Lin amo ang matuod nga iloy ni Mayor Alice kag indi si Amelia Leal nga isa ka kabulig sa balay.
Matandaan nga ginhangkat man ni Senador Gatchalian ang alkalde nga magpaidalom na lamang sa DNA test kaupod kay Lin agud maresolba ang isyu.
Sa iya naman sulat, ginsiling ni Mayor Alice nga indi matuod ang mga akusasyon nga non-existing person ang iya iloy nga si Amelia Leal. Ginklaro man sini nga mistress kag business partner sang iya amay si Lin kag indi amo ang iya matuod nga iloy.
Nagpangabay man ini nga indi na pagdalahigon sa isyu ang iya mga utod bangud lain-lain ang ila nationalities, nagdaku sila nga separado, kag lain-lain man ang ila mga iloy.
Gin-athag man sini nga indi kasado ang iya amay kag iloy, apang isa siya ka Pilipino kag may gina-uyatan siya nga Philippine passport.
Sa iya man claims, ginsiling sini nga pareho nga may negosyo diri sa Pilipinas kag sa luwas sang pungsod ang iya amay, apang indi ini involved sa mga aktibidad sang Philippine Offshore Gaming Operators (POGO).
Kahapon,Hunyo 5, sang ginpasa ni Mayor Alice ang iya letter of explanation kadungan man sang executive session sang Senate women and children panel agud nga diskusyunan ang gina-alegar nga kaaangtanan sini sa POGOs.
