Gindeklarar ni Mayor Alice Guo sang Bamban, Tarlac ang net worth nga P177.5 million, assets nga P367 million kag liabilities nga P189.633 million sa iya statement of assets, liabilities and net worth (SALN) as of December 2023.
Sa iya SALN nga ginpasa sa Senate committee on women and children nga ginapangunahan ni Sen. Risa Hontiveros, ginlista man sini ang siyam sa iya propiedad lakip ang anum sa Marilao, Bulacan, duha sa Bamban kag isa sa Capaz, Tarlac.
Nakuha ini nga mga propiedad sa masobra P20 million kun sa diin ang una ang nabakal sang 2008.
Gin-rehistro man sang alkalde sa idalom sang iya pangalan ang tatlo ka dump trucks nga nagabalor sang P2 million kada isa.
May yara man sang isa ka helicopter balor P60 million apang ginsugid na sini anay sa Senate public hearing nga ginbaligya na ini nga aircraft sa British company sini lang nga tuig.
Gindeklarar man sini bilang personal properties ang shares of stocks sa QJJ Embroidery Center Inc., Con-HORQ Summer Real Estate Group Inc. kag Balesin Island Club Inc.
Nakabutang man nga may yara ini sang alahas nga P1.5 million kag P198 million sa bangko kag cash on hand.
Matandaan nga sang public hearing sa Senado sang Mayo 23, ginpresentar ni Hontiveros ang pictures sang 16 ka mga salakyan ni Guo kun sa diin nalakip ang sport utility vehicles, pickup trucks, closed vans kag dump trucks. Nagpanindugan si Guo nga ini nga mga propiedad ang iya nga naangkon samtang naga-trabaho siya sa farm sang iya amay. Ginpahayag sini anay nga nagsugod siya trabaho sa edad nga 14-anyos kag naga-loan sa bangko tubtub subong. Ginpanginwala man sini anay nga nagapanag-iya siya sang luxury sports car bangud gin-alegar nga ginhulam lang ini sa abyan para sa car show sa Tarlac.
