Liwat nga magaatubang sa Senado subong nga adlaw, Septyembre 17, si dismissed Bamban, Tarlac Mayor Alice Guo ukon ang Chinese national nga si Guo Hua Ping.
Ini nga hearing maga-sentro sa Philippine offshore gaming operators (POGOs) kag iligal sini nga aktibidad kaangay sang scamming kag human trafficking.
Kahapon, gin-aprubahan sang Valenzuela Regional Trial Court Branch 282 ang request ni Senate committee on women chairperson Senator Risa Hontiveros nga pakadtuon si Guo sa upper chamber 9:00 subong nga aga.
Ginmanduan man sang korte ang Philippine National Police (PNP) nga maghatag sang istrikto nga seguridad kay Guo kag magpasa sang written report sa oras nga mabalik na ini sa custodial facility sa Camp Crame kun sa diin naka-detain ini subong.
Lakip man sa ginalauman nga magtambong amo ang ginaalegar karelasyon ni Guo nga si Mayor Liseldo Calugay sang Sual, Pangasinan kag masobra 40 ka iban pa nga resource persons.
Matandaan nga ang nagligad nga semana, gingisa man si Guo sa Senado sa mga pamangkot sa iya pagpalagyo sang Hulyo apang bisan ano ka-puga, wala sang ginaluad nga impormasyon ang dismissed mayor bangud ginasabat sini nga nahadlok siya para sa iya safety.
Gindagdagan ini sang contempt order apang ginbalik man gihapon sa custodial facility sang PNP bangud ang korte ang may hurisdiksyon sa iya matapos nga wala ini nagpyansa sa iya kaso nga graft.
Sa hearing man sang nagligad nga semana nasapubliko ang pangalan ni Mayor Calugay bangud ginaalegar madamo sila sang business partnerships ni Alice Guo kag indi lamang limitado sa POGO.
Istoryahan man sang mga senador kun isapubliko nila ang pangalan sang tawo nga ginsulat ni Guo sa Papel nga amo suno sa iya ang nagapanag-iya sang yate kag nagbulig sa iya kag sa iya mga utod (Sheila kag Wesley Guo) nga makabiya sa Pilipinas.
