Nagapati ang chairman sang Senate Committee on National Defense, Security and Peace nga posible nakaguwa na sa Pilipinas ang suspendido kag kontrobersyal nga alkalde sang Bamban, Tarlac nga si Alice Leal Guo ukon si Guo Hua Ping.
Wala sang ebidensya nga naplastar si Senator Jinggoy Estrada apang ginpahayag niya ini kasunod sang hearing sa upper chamber kaangot sa iligal nga operasyon sang Philippine Offshore Gaming Operators (POGO) kun sa diin nagapanindugan man ang legal counsel sang kampo ni Guo nga yara pa ini sa Pilipinas.
Una naman nga ginpahayag ni Senator Win Gatchalian ang kaangay man nga opinyon kun sa diin posible suno sa iya nga naggamit si Guo sang Chinese passport bangud naga-uyat ini sang Chinese and Philippine passports halin sang 2008 tubtub sang 2011.
Nahibaluan nga may arrest order na nga ginpapanaog ang Senado batok kay Guo sang nagligad nga weekend bangud wala ini nagatambong sa hearings sang Senate committee on women, apang sang ginkadtuan sang pulis kag Office of the Sergeant-at-Arms, wala ini nakita sa iya tanan nga rehistrado nga address.
NATIONWIDE BAN SA POGO?
Sa bahin naman sang ginaduso nga nationwide ban sa POGO, ginpahayag ni Sen. Estrada nga halin sang una, ang iya panindugan amo nga wala man sang problema kun magpadayon ang POGO nga legal ukon may lisensya halin sa Philippine Amusement and Gaming Corporation (PAGCOR).
Dapat man suno sa iya nga kun magpadayon ang operasyon sini nga licensed POGOs, dapat nga mga Pilipino ang masobra 50% sang ila nga mga empleyado.
Sa interview sang Bombo Radyo sa senador, ginpahayag man sini nga diretso na sang Iloilo City Council ang desisyon sini nga magpasar sang resolution nga i-ban ang POGOs sa Iloilo City bilang preemptive measure pananglitan hana man nga magsulod ang amo nga operasyon sa syudad.
Nahibaluan nga ang ginaduso nga pag-ban sa POGO sa Pilipinas ang nag-ugat sa nagkalain-lain nga mga krimen nga naangot diri kaangay sang human trafficking, swindling, pagpang-scam kag madamo nga iban pa nga makabig naman nga isyu sa national security.
