Sa ikaduha nga kahigayunan, gin-cite in contempt sang Senate Committee on Women, Children, Family Relations and Gender Equality si dismissed Bamban, Tarlac Mayor Alice Guo.
Ini ang kasunod man sang padayon sini nga pagbinutig sa mga pamangkot sang mga senador.
Nahibaluan nga ini ang pinakauna nga kahigayunan nga nag-atubang si Guo sa senado matapos nagpalagyo sa Pilipinas, apang nadakpan sa ulihi sa Indonesia.
Suno kay Senator Risa Hontiveros, chairperson sang panel, nagsanto ang fingerprints ni Guo sa Chinese national nga si Guo Hua Ping.
Apang sa baylo nga mag-ako sang iya matuod nga identity, nagpamalibad ini nga magsabat bangud sa nabaton sini nga pamahog sa iya kabuhi.
“Alice Guo is continuing to lie to this committee despite glaring evidence that she is a Chinese national named Guo Hua Ping, whose father Jian Zhong Guo is Chinese based on her own declaration in this committee, and whose mother Lin Wen Yi is also Chinese based on her own declarations in bank documents by the way verified by the AMLC.”
Suno naman kay Senator Joel Villanueva, wala sang labot ang security threat sa pagsabat ni Guo.
Maathag suno kay Hontiveros nga ginahampangan ni Guo ang senado kag layi sang Pilipinas.
Ini ang ginsegundahan naman ni Villanueva.
Samtang suno naman kay Sen. Koko Pimentel, sa ginpatigayon nga recess, ginbulgar mismo ni Guo ang nabaton sini nga death threat.
Ginpahayag sini nga luyag kuntani ni Guo nga magsabat sa executive session, apang ini ang ginbasura sang mga senador.
Ginhatagan naman ni Sen. Jinggoy si Estrada sang isa pa ka kahigayunan nga magsabat si Guo, apang nagpakatig-a ini nga magsugid sang matuod.
“Ang alam ko po I was born in Tarlac. Honestly, hindi ko po alam kung paano nangyari. Basta alam ko alam ko ako po si Alice Guo. At pasensya na rin po kung hindi kayo naniniwala.”
Tungod sini, nagdesisyon na ang senador nga i-cite ini in contempt.
