ILOILO CITY – Wala nagpirma si Alimodian, Iloilo Mayor Kenneth Alfeche sa petition sang 34 ka mga alkalde sa probinsya nga nagkakas kay Dr. Ma. Luz De Los Reyes bilang Schools Division Superintendent sa Department of Education- Schools Division of Iloilo.
Sa interview sang Bombo Radyo kay Mayor Alfeche, iya ginpahayag nga wala siya sang may nakita nga sala nga pamalakad ni Delos Reyes sa sektor sang edukasyon sa probinsya.
Suno sa alkalde, sa ila nga banwa, suportado sang anay superintendent ang ila nga mga programa sa edukasyon.
Nahibaluan lamang ni Alfeche nga may yara sang petition letter sang gintawgan ini sang wala na niya ginhingadlan nga alkalde kag ginhambalan nga magpirma apang nagpamalibad ini.
Ginpahayag dugang sang alkalde nga wala na siya nakahibalo kun sin-o ang nagpamuno sa petition.
Kung madumduman, Mayo 15, 2023, ginmando ni Department of Education Undersecretary Atty. Revsee Escobedo ang pagkakas kay De Los Reyes sa katungdanan kag ginbalik liwat bilang Division Superintendent sang Division of Iloilo City.
Suno kay Mayor Rosario Mediatrix “Trixie” Fernandez sang banwa sang San Enrique kag League of Municipalities of the Philippines- Iloilo Chapter President, nangin matinaas-taason si De Los Reyes sa ginpatigayon nga pagsinapol kaupod sang iban nga mga alkalde sa probinsya.
Depensa naman ni De Los Reyes, mahimo nga na-misinterpret lamang sang mga alkalde ang iya nangin panabat kag pamatasan.
