ILOILO – Ginalantaw sang mga kapulisan nga duha tubtob tatlo ka-tawo ang nagluthang-patay sa maglive-in partner sa Malamboy- Bondolan, Alimodian, Iloilo.
Ang mga biktima amo sanday Areston Alves, 62, kag Georgia Miller, 60 lunsay residente sang nasambit nga lugar.
Sa interview sang Bombo Radyo kay Pol. Major Sullen Domingo, hepe sang Alimodian Municipal Police Station, iya ginpahayag nga nasapwan nalang nga lunsay wala na sang kabuhi kag nagahapaon sa ugsaran sang ila balay si Alves samtang yara naman sa sulod sang ila hulot nga nagahayangon si Miller.
Suno kay Domingo, madamo sang igo sang bala ang gwa kag sulod sang balay sang mga biktima rason nga posible indi lamang isa ka tawo ang sa likod sang krimen.
Ginpahayag ni Domingo nga ginahulat nalang ang resulta sang ballistic examination sang mga narekober nga basiyo sang 45 caliber pistol sa lugar.
Matandaan nga nag-angkon sang patal nga igo sa ulo kag likod ang lalaki samtang pilas sa ulo naman ang naangkon sang babaye nga gintunaan sang ila kamatayon.
Samtang, gintuad naman ni barangay kagawad Robert Aldamar sang Malamboy- Bondolan, Alimodian, Iloilo nga wala sang kontra ang mga biktima nga sanday Alves kag Miller.
Sa interview sang Bombo Radyo kay Aldamar, iya ginpahayag nga sang nagligad lamang nga tuig nagpuyo sa amo nga lugar ang mga biktima.
Matalunsay man suno sa iya ang pagpangabuhi sang mag-live in partner sa diin nagapakig-abyan pa ang mga ini sa ila mga kasilingan.
Nahibaluan nga sa subong, padayon pa nga naga-imbestiga ang Alimodian Municipal Police Station sa matuod nga motibo sa likod sang krimen.
