ILOILO – May natumod na nga mga persons of interest ang Alimodian Municipal Police Station may kaangtanan sa nagluthang-patay sa maglive-in partner sa Malamboy- Bondolan, Alimodian, Iloilo.
Ang mga biktima amo sanday Areston Alves, 62, kag Georgia Miller, 60 lunsay residente sang nasambit nga lugar.
Sa interview sang Bombo Radyo kay Police Senior Master Sgt. Vicente Hablado II, imbestigador sang Alimodian Municipal Police Station, iya ginpahayag nga, santo sa ila padayon nga imbestigasyon, indi magnubo sa tatlo ang mahimo nagluthang-patay sa maglive-in partner.
Suno kay Hablado, siyam ka mga basiyo sang .45 caliber pistol ang nasapwan sa krimen sa diin nahamtang sa gwa kag sulod sang balay sang mga biktima.
Samtang, sa naggwa nga resulta sang autopsy examination sa lawas ni Alves kag Miller, lunsay naka-angkon sang patal nga igo sa ulo kag lawas ang mga ini nga amo gintunaan sang ila kamatayon.
Nagpamalibad naman si Hablado nga ituad ang identity sang mga person of interest agud indi maapektuhan ang nagapadayon nila nga imbestigasyon sa matuod nga motibo sa likod sang krimen.
Matandaan nga nasapwan nalang nga lunsay wala na sang kabuhi kag nagahapaon sa ugsaran sang ila balay si Alves samtang yara naman sa sulod sang ila hulot nga nagahayangon si Miller.
