ALIMODIAN, ILOILO — Padayon ang hot pursuit operation sang Alimodian Municipal Police Station sa suspek nga nagpalagyo kag nagtiro sa duha ka mga indibidwal sa banwa sang Alimodian, Iloilo.
Ang mga biktima amo sanday Jigson Villanueva, 29-anyos, photographer kag ang utod sini nga si Jessie Reign Villanueva, 19-anyos, lunsay residente sang Magallanes St., Poblacion, Alimodian, Iloilo.
Ang suspek amo si Ryan Blancia, 40-anyos, kasado kag residente sang Brgy. Ulay-hinablan, Alimodian, Iloilo, apang nagapauli man sa Brgy. Ban-ag, sa amo man nga banwa.
Sa interview sang Bombo Radyo kay Police Senior Master Sergeant Michael P. Alingalan, imbestigador sang Alimodian MPS, iya ginpahayag nga nagbaisay ang suspek kag ang biktima sa atubang sang isa ka punerarya, kun sa diin malapit man ang balay sang mga biktima.
Suno kay Alingalan, bangud nakainom ang suspek kag ang isa ka biktima, nagbaisay ini kag naglab-ot sa paghangkatanay, rason man nga nagkuha ang biktima sa ila balay sang armas-luthang kag pagbalik niya, idto na kag nagbaylohanay sang lupok
Ginpahayag man sini nga may dala na nga daan ang suspek sang iya armas-luthang antes paman nakakuha ang biktima sang iya pusil.
Bangud diri, nakaagum sang pilas ang biktima sa natuo nga bahin sang iya nga hita kag nakaagum naman ang iya utod sang pilas sa tiyan.
Naigo naman ang suspek sa tuo nga bahin sang iya tiil, apang natigayon nga makapalagyo padulong sa direkston sang Cabatuan, apang sa pinakaulihi nga imbestigasyon, posible nga nakalab-ot pa ang suspek sa banwa sang Janiuay ukon Lambunao.
Santo sa latest medical bulletin sang mga biktima, natigayon nga ma-operahan ang biktima nga si Jigson Villanueva apang ang iya utod nga si Jessie Reign ang nagapabilina sa ospital bangud wala pa makuha ang bala sa iya nga tiyan.
Narecover naman malapit sa crime scene ang 5 ka empty shell sang 357 nga pusil kag 3 ka mga basiyo sang 9mm caliber pistol.
