ILOILO CITY- Patay na ang paglaum sang Panay Electric Company nga mapadayon ang 97 ka tuig nga power distribution sa Syudad sang Iloilo.
Ini matapos nga ginbasura sang House Committee on Legislative Franchises ang re-application for franchise sang Panay Electric Company.
Sa interview sang Bombo Radyo kay anay Iloilo City Councilor Joshua Alim, iya ginpahayag nga sa ginpatigayon nga hearing, gin-move ni Surigao del Sur-2nd District Representative Johnny Pimentel ang pag-deny sang franchise application sang Panay Electric Company kag wala sang bisan isa ang nagpamatok.
Suno kay Alim, nakumbinsi ang tanan nga yara sa hearing nga indi na paghatagan sang tsansa ang Panay Electric Company nga liwat mangin power distributor sa Iloilo City matapos gin-presentar ni Representative Pimentel ang tanan nga 189 ka mga complaints batok sa Panay Electric Company nga ginpadala ni Alim sa Energy Regulatory Commission.
Ginpahayag ni Alim nga kaangay nga duha ka beses nga napatay ang application for franchise sang Panay Electric Company apang suno sa iya, kun sang 17th congress, wala maaprubahan ang franchise renewal sang Panay Electric Company bangud sa kakulang sang tiempo, subong nga 18th congress, ini ang dalayon na gid nga ginbasura.
Samtang dismayado naman si Alim nga wala ini nahatagan sang kahigayunan nga makahambal sa hearing kaina apang sa pihak sini, nalipay siya sa nangin resulta sang hearing.
Nangin emosyonal naman si Iloilo City Lone District Representative Jam-jam Baronda sa resulta sang hearing.
Gin-ako ni Rep. Baronda nga masakit ini para sa iya bangud nangin malapit man siya sa pamilya Cacho nga amo ang nagapanag-iya sang Panay Electric Company.
Apang suno kay Baronda, mas pasulabihon niya ang kaayuhan sang mga pumuluyo. Dugang pa niya, malawig na nga tinion ang ginhatag sa Panay Electric Company agud mapaayo ang ila serbisyo apang nausikan lang ini.
Samtang, ginpahayag ni Baronda nga nangin palaagyan man ini agud matinluan ang iya pangalan may kaangtanan sa akusasyon sa iya ni anay Iloilo City Councilor Plaridel Nava nga pro-PECO ini kag mahimo siya ang sa likod sang re-application for franchise sang Panay Electric Company sa kongreso.
