ILOILO CITY – Ginpaidalom sa hospital arrest ang alkalde sang banwa sang Janiuay, Iloilo matapos nga nagpalupok sang armas kag ginkastigo sang ginapahayag grupo sang mga agi sa Villa Teresita Inland Resort sa banwa sang Maasin, Iloilo.
Ginabantayan karon sang kapulisan si Mayor Jojo de Paula nga padayon nga ginabulong sa Iloilo St. Paul’s Hospital.
Sa interview sang Bombo Radyo Iloilo, ginpahayag ni S/Insp. Rey Cordero, hepe sang Maasin Police Station, kinahanglan nila nga i-kustodiya ang alkalde.
Nagpadulong sa resort ang alkalde agud i-selebrar ang kadalag-an sa basketball kag sang pauli na ang grupo sini, ginaalegar nga nagpalupok ang alkalde sang 9mm pistol sini.
Naigo sa tiyan ang biktima nga si Donald Robles, 20, sang Barangay Naslo, Maasin, Iloilo nga ginapahayag isa ka agi.
Bangud sini, ginpulihan kastigo ang alkalde nga gindala naman sa Iloilo St. Paul’s Hospital.
Determinado naman ang pamilya Robles nga magpasaka sang reklamo batok sa alkalde.
Samtang nagpangayo naman sang pasaylo si Mayor De Paula kay Maasin Mayor Mariano Malones sa natabo nga iskandalo.
Nahibaluan nga ang nasambit nga resort ang ginapanag-iyahan ni ayor Malones.