ILOILO CITY– Nagdepensa ang alkalde sang Badiangan sa pagkwestyon sang Department of Social Welfare and Development Region 6, sa kun ngaa wala naubos hatag ang gintalana nga pondo para sa cash assistance sa idalom sang Social Amelioration Program, sa banwa sang Badiangan.
Ini matapos may yara sang sobra ang pondo sang Badiangan, nga sarang pa mahatag sa masobra 100 ka mga benipisyaryo.
Sa interview sang Bombo Radyo kay Badiangan Mayor Serafin Villa Jr., iya ginpahayag nga may yara sila sang 4,499 ka target nga mga benepisyaryo santo sa ginhatag sang DSWD, kag nagpatigayun man sila sang validation sa mga kwalipikado nga benipesyaryo lakip na ang pagsunod sa guidelines.
Halos 4,370 suno sa alkalde ka mga kwalipikado nga benipesyaryo ang ila nahatagan sang cash assistance, rason nga halos makaigo pa sa masobra isa ka gatos ka benipesyaryo ang balor sang kwarta nga nabilin sa ila.
Suno kay Villa, may sobra ang pondo bangud sa ila banwa wala na sila sang makabig kwalipikado pa nga mga benipesyaryo nga mahimo mahatagan sang cash assistance.
Pahayag pa niya , sang nakaligad lang sila nga semena nakatapos panghatag sang cash aid, kag napahibalo naman niya ang DSWD tuhoy sa sobra nga pondo para sa SAP.
Dugang pa sang natungdan, ginhambalan sila sang DSWD nga sekyarun kun may yara pa sang mahimo mahatagan, apang sa ila assessment wala na sang kwalipikado pa nga benipesyaryo, bangud kun hatagan nila ang mga indi kwalipikado, kwestyonon naman sila sa kun ngaa naghatag sila nga wala sang basehan.
