ILOILO CITY- Gin-athag sang Iloilo Provincial Environment and Natural Resources Office nga may yara sang otoridad ang isa ka alkalde nga pasakaan sang kaso ang sin- o man nga tawo nga naglansang, nagtucker ukon nagtapik sang campaign tarpaulin ukon posters sa puno sang kahoy nga yara sa sulod sang public plaza.
Sa interview sang Bombo Radyo kay Salvador Manglinong Jr., OIC head sang PENRO ,iya ginpahayag nga nasaad ini sa presidential decree 953 nga naga- penalize sang unauthorized cutting, destruction, damaging kag injuring sang kahoy, tanom kag vegetation.
Suno kay Manglinong, kun yara naman sa subdivision ang puno sang kahoy, ang mga otoridad sang subdivision ang mahimo nga maka- file sang kaso batuk sa tawo nga naglapas sa amo nga presidential decree.
Samtang kun ang puno sang kahoy nga gintapikan sang tarpaulin ang ginapanag- iyahan sang isa ka indibidwal, gina-notify lang nila ang tagbalay kag ginahambalan nga ginadumilian ini.
May yara naman sang mga designated common poster areas nga gintumod nga pahamtangan sang mga kandidato ukon supporters sang kandidato ang mga campaign materials kag indi dapat pagtandugon ang mga puno sang kahoy.
Paathag ni Manglinong, ang gamay nga paghalit ukon pagpilas sa kahoy ang mahimo nga tunaan sang kamatayon sini.
Ang nagalapas sa Presidential decree ang mahimo magpangatubang sang indi magnubo sa anom ka bulan kag indi magsobra sa duha ka tuig nga pagkapreso ukon multa nga indi magnubo sa P500 kag indi maglapaw sa P5,000, ukon pareho nga pagkapreso kag multa depende sa desisyon sang korte.
