ILOILO – Ginabasol ni Batad, Iloilo Mayor Elvira Alarcon ang mga pasaway nga pumuluyo nga makapila na sawayon nga untaton na ang pagtanom sang mais nga nagatuga sang paglandslide kag pagbaha.
Sa interview sang Bombo Radyo kay Alarcon, may mando sa pagtanom sang mga kahoy si Cong. Raul ‘Boboy’ Tupas sa banwa, apang indi makalab-ot duha ka-tuig kag kalbo naman liwat ang kabukiran.
Suno kay Alarcon, may yara man mando halin kay Department of Environment and Natural Resources (DENR) Secretary Roy Cimatu sang nagligad nga tuig agud hugot nga ipatuman ang pagtanum sang mga kahoy sa banwa, apang wala natuman.
Sa baylo suno sa alkalde, nagtanum ang mga pumuluyo sang maisan sa diin ginrason nga wala sang alternatibo nga pangabuhian.
Pahayag ni Alarcon nga ang katamad sang pumuluyo ang nagatuga sang problema bangud indi dapat magsalig sa pagtanom sang mais nga amo ang indi man makapasanyog sang pangabuhi.
Ginabata anom ka mga barangay sa Batad, Iloilo nga lunsay malapit sa mga suba ang apektado kun magbubu ang mamunog nga ulan.
Suno sa alkalde, may alternatibo nga ginahatag ang DENR nga magtanum sang prutas ukon utan agud kabigon nga palangabuhian.
Dugang sang natungdan nga magasapol siya sa liwat kaupod ang ahensya agud masolusyunan ang problema sa kabukiran.
Apang, ginatudlo man ni Alarcon ang DENR nga amo ang responsable sa nagaluntad nga pagkalbo sang kabukiran.
Pahayag sang natungdan, nagatinguha man siya sa pagtukod sang alternative livelihood para sa pumuluyo apang kinahanglan tagaan sang tyempo sang nasambit nga ahensya ang paghatag sang nagakaigo nga solusyon.
