Gin-athag ni Dueñas, Iloilo Mayor Mamerto Pelopero III nga wala sang may nagkaladakpan nga mga quarry operators nga ginapahayag nagbyahe apisar nagabubo ang mamunog nga pag-ulan kahapon, Oktubre 24.
Ini ang kasunod sang reklamo sang pila ka mga barangay nga apektado sang mga dalan nga nagkalaguba bangud sa ginapahayag paglabay sang mga dalagko nga truck bisan nagaulan.
Sa interview sang Bombo Radyo kay Mayor Pelopero, iya ginpahayag nga may polisa para sa mga quarry operators nga indi ang mga ini makabyahe sa tion nga magbubo ang ulan ukon bisan magpanalithi lang.
Suno sa alkalde, nakapadulong man siya sa pila ka mga barangay halin sa Capuling padulong sa Cabudian kag ang mga dumptruck nga nakuhaan sang litrato sang mga pumuluyo ang naka-stand by lang sa dalanon bangud mabaskog ang pagbubo sang ulan.
Dugang pa niya, natural lang nga nagalunang ang mga dalanon sa tion nga mag- ulan ilabi na nga nagalabay man ang pribado nga mga salakyan.
