Nagpaguwa sang personal nga kuwarta si Janiuay, Iloilo Mayor Paulino “Paul” Parian para nga mabulig-buligan lang anay ang mga empleyado sang local government unit nga wala gihapon nakabaton sang sweldo tubtub subong.
Halin sa alkalde pakadto sa job hires ang apektado sang atrasado nga sweldo sa amo nga banwa bangud sang pag-expire sang appointment sa ila nga officer-in-charge treasurer nga si Emily Delos Santos sang nagligad pa nga Hulyo 2.
Sa interview sang Bombo Radyo sa alkalde, iya ginpahayag nga tag-P1,000 ang iya ginpanghatag sa sulod na sang duha ka adlaw bilang sapin-sapin sa kinahanglanon sang mga empleyado.
Magluwas diri, una na nga ginpahayag nga gina-follow up sini sa central office sang Department of Finance ang proseso agud nga masolusyunan na ini bangud indi lamang sweldo sang mga empleyado ang apektado kundi tanan nga pondo sa transaksyon sang local government unit.
Suno sa alkalde, personal man nga magakadto ang ila nga municipal administrator sa central office agud nga mapadasig pa gid ang proseso.
Nagdepensa man ang alkalde nga isyu nga siya ang balasulon sa delay bangud wala sini gin-endorso agud mangin full-fledged na ang treasurer sang banwa.
Suno kay Parian, pila ka beses na sini ginpahanumdom nga i-proseso ang extension sang designation bangud sa kada “acting” kag “officer in charge” nga kapasidad, nagalawig lang ini sang isa ka tuig.
Indi matuod suno sa alkalde nga wala siya nag-endorso ukon nag-rekomenda, bangud ang natabo suno sa iya, nagbalik-balik ang papel sang personnel bangud sala ang nakabutang sa dokumento bangud wala man sang koordinasyon.
Ginpahangop man sini nga sandig sa Bureau of Local Government Finance, ang human resource management officer ang maga-proseso sang dokumento kag indi ang local chief executive.
Una na nga ginpahayag ni Sangguniang Bayan Member James Ian Adelantar nga igadangop nila sa Office of the Ombudsman ang ila nga sitwasyon subong bangud sa atrasado nga sweldo.
