Naka-admit sa isa ka ospital sa syudad sang Iloilo si Janiuay, Iloilo Mayor Bienvenido Margarico matapos nagpositibo sa COVID-19.
Sa interview sang Bombo Radyo sa alkalde, iya ginpahayag nga nakitaan siya sang mild nga sintomas sang balatian umpisa sang Byernes.
Posible suno sa natungdan nga na-expose siya sa virus bangud sang nature sa iya nga trabaho bilang alkalde sang banwa.
Fully vaccinated na si Margarico batok sa amo nga balatian. “Indi kamo magkabalaka kay ang Mayor ninyo mild lang nga sintomas [sang COVID-19] ang ginapakita. Fully vaccinated ako. Pila ka adlaw, balik naman kita sa trabaho ta.”
Una naman nga ginpahayag sang LGU Janiuay nga padayon subong ang contact tracing. Sirado ang opisina sang alkalde subong, Agusto 10, para sa disinfection.
I-anunsyo lang ugaling kun san-o liwat buksan sa publiko ang amo nga opisina. ##
