MIAGAO, ILOILO– Ginkumpirma sang alkalde sa banwa sang Miagao nga may yara sang ikaduha nga kaso sang nagpositibo sa coronavirus disease 2019 sa iya banwa.
Sa interview sang Bombo Radyo kay Miagao Mayor Macario Napulan, iya ginpahayag nga ang ikaduha nga nagpositibo sa nasambit nga virus sa banwa amo ang isa ka 94 anyos nga lalaki, may yara sang mild hypertension kag diabetes.
Suno kay Napulan sang Marso 24, gindala ang amo nga lalaki sa health center sang banwa, apang duha ka semana antes ini nagpadulong sa pasilidad, nagasuprer na ini nga daan sang ubo kag hilanat.
Pahayag ni Napulan, ginrefer pa ini sa isa ka government hospital kag sang ulihi ginsaylo sa pribado nga hospital sa diin didto natukiban nga may yara ini sang pneumonia, kag sang Abril 1 ginpatigayun ang covid-testing sa diin nakumpirma nga ini ang gintapikan sang virus.
Nagalibog man ang iya ulo suno kay Napulan sa kun paano nakaangkon sang covid-19 ang amo nga pasyente bangud wala man ini sang travel history kag dira lang ini nagalibot-libot lang sa ila compound.
Suno sa alkalde, nagpatigayon na sang disinfection sa compound sang pasyente lakip na sa bug-os nga barangay.
Samtang ang satellite market nga nahamtang sa amo nga barangay sa subong ang para nalang sa mga pumuluyo sa nasambit nga barangay kag magapangita nalang sang iban nga satellite market para sa mga residente sang kaiping nga kabarangayan.
Sa subong suno sa natungdan, ginpaidalom na sa strict enhanced community quarantine ang bug-os nga barangay kag may yara sang designated nga tawo nga maga atender sa kun ano ang kinahanglanon sang mga pumuluyo.
