MIAGAO,ILOILO Nagpangayo sang bulig kay first district representative Janette Garin ang alkalde sang Miagao agud mapatigayun ang swab test sa mga naka close contact sang 94 anyos nga lalaki nagikan sa nasambit nga banwa nga nagpositibo sa coronavirus disease 2019.
Sa interview sang Bombo Radyo kay Miagao Mayor Macario Napulan, iya ginpahayag nga luyag niya kuntani mapa swab test ang mga naka close contacts sang pasyente agud mahibaluan kun ano ang ila tagsa ka mga health status.
Suno kay Napulan, ginabanta yara sa 10 ka mga persona ang nakaupod sini sa iya balay nga ginalakipan sang iya mga kabataan kag apo, kag may pila pa ini ka persona nga naka-atubang sa health center sang Miagao.
Pahayag pa sang alkalde sa subong, may yara sang duha ka persons under investigation sa Miagao, isa ang naka admit sa hospital samtang ang isa ang naka home quarantine, samtang 40 nalang ang persons under monitoring bangud ang 360 ka persona ang nakatapos na sang ila home quarantine.
Nagapangabay man ang natungdan nga indi magpanic ang mga pumuluyo sang Miagao bangud sila sa lokal nga pamunuan ang nagahimo sang ila tagsa ka masarangan agud indi na maglapta pa ang virus kag kuntani sundon sang tanan ang ginapatuman nga physical distancing.
